Stefano Romelli e sia equipa As dattan il bainvegni!

L’istorgia dal Grotto Bundi è quasi tschientenara. En in dals lieus ils pli autentics dal Tessin ha fundà in tschert Abbondio Calderari avant passa 80 onns l’oriund Grotto, ch’el ha numnà tenor la varianta dialectala da ses prenum “Bundi”. Sco quella giada retschaiva il Grotto Bundi enfin oz ses giasts en in conturn da natira intacta al pè dal Monte Generoso.

L'autenticitad e la tradiziun s'uneschan ad in'atmosfera cordiala e famigliara. Qua creeschan Sandrine e Stefano Romelli dapi il 1993, pia dapi prest in quart tschientaner, spaisas deliziusas servidas cun passiun. Igl è in viadi a la rescuverta dals gusts da pli baud, nua che la pulenta cotga sin il fieu avert vegn proposta en nundumbraivlas variantas en cumbinaziun cun selvaschina, charn e bulieus. Betg da manchentar è la visita dals tschalers da vin dal Grotto che reuneschan autentics stgazis da la regiun che sa cunfan excellentamain cun las tratgas servidas. En il Grotto pon ins cumprar directamain chaschiels e liongias tipicas, producids sco pli baud e conservads tenor la tradiziun. A partir da d’immediat datti questa offerta er online. Il Grotto Bundi As spetga per gentar e tschaina mintga di, danor il glindesdi.      

A la rescuverta da la simplicitad

Al Grotto Bundi è la pulenta la regina da la chasa en mintga temporada da l’onn. Tant en las fraidas notgs d’enviern che la stad en la sumbriva da la bostga intganta questa spezialitad gustusa er ils giasts ils pli pretensius. Mintga giada ch’ella vegn purtada a maisa èsi ina vaira festa ch’ans regorda dal muments ils pli genuins dal passà. Stefano Romelli prepara la pulenta en ina chaldera d’arom maschadond premurusamain diversas sorts da farina: quella da tirc mieuta tant grossa che fina, e quella saracena. Quest’ultima ingredienza dat ina nianza exclusiva a la pulenta dal Grotto, in aspect ed in gust savurus e rustical. Ultra da la farina da tirc mo anc aua e sal: l’agiunta da scadina spezaria. Ed «eccola» gia bel e pronta per coier quai che vegn fat – cun respect a la tradiziun – plaunsieu e sin il fieu avert per almain in’ura e mesa, maschadond da temp in temp, fin che la pulenta cuntanscha la gista consistenza per vegnir servida.

Tgi che vul purtar er a chasa la magia da questa pulenta nunemblidaivla po cumprar la maschaida preparada directamain al Grotto u empustar ella online. La pulenta dal Grotto Bundi: uschè simpla, uschè gustusa!